Pärrdsroolasch Mienche, ei, dass honnich noch gekännd. Medd dämm hadd's 's Lääwe nidd allsegudd gemännd. 's waa degg ellään unn aa eewich grongk unn donn kumm e Sòòndiem uff da Bongk. Medd zwei Kenn, lellichawies, òòhne Monn, hadd's troddsdääm 's halwe Lääwe iwwaschdonn. Rabbeldurr unn e Wissaasch, kääswiss, zwei Mordszòhnligge im Gebiss, unn iwwazòò medd iwwerich genungk Falde: E "Original" - seed ma zùù so truuriche Geschdalde. Imma läälich unn nidd gudd druff, degg vaschommierd bis gonns enuff, e waggelicha Gong troddsem Schdägge, sinna gonns Lääwe waa känn Zuggaschlägge. Se kurds kumm isch's Mienche vunn Òònfong òòn; dass lissd sich iwwa das Minsch im Riggbligg sòòn. So gesiehn, isch's aa känn Wunna, dasses medd iehm gedd Doolasch Gäwwel ball enunna. Gullaschbräch, ma kinnd aa sòòn: Dass Minsch hadd schunn's Doolehämmedche òòn. Dass hääschd, 's wärrd nimmeh allselong duure, donn komma um's aame Mienche truure. Unn monche Lied wärrd's wahscheins fräie, wänn 's Mienche mool dudd uffem Kirchhof läie. Wäll‚'s hadd, wie de ään olla onna hadd geklaad, aa als e frächi Schniss gehaad unn hadd donn die Lied medd sinnem schäbbe Mull gonns vamässe als vaschull. Wie schunn gesaad: Medd iehm hadd's 's Lääwe nidd gudd gemännd! Ei, 's Mienche, dass aam Ding honnich noch gekännd!
* Das Gedicht wurde im November 2023 im Saarpfalz-Jahrbuch 2024 erstveröffentlicht.
Top | Mundartgedichte-Auswahl | Mundart-Auswahlseite
| Inhaltsverzeichnis
Bitte beachten Sie meine Datenschutzerklärung!
| Last update: 29.11.2023 | Copyright: Paul Glass 1997-2023 |